fbpx Skip to main content

Bienoa 25 joar lid van oos vereniging, van dien eige fanfaar,
Nege joar besjtuurslid, initiator en webmaster van os internetsite,
Kertrekker van de sjponsorcommissie,
Eine muzikant en leefhöbber van meziek in hert en neere,
Ein van oos hoorntjes mit dè typische Pexie-sound.
Es ’t werm woor, in de zomeroetveuring van os fanfareuniform;
Korte zjwarte books, wölle sök en hoag bergsjoan.

Rogier haet get neergezat binne de fanfaar.
Vol idëe en initiatieve,
Zoa veul det ter ’t soms zelf neet biej kosj haeje.
Altied krities, mèr waal oprech.
Geleefdj biej idderein.

Kinmerkend aanwezig mit ziene aanstaekende lach,
Piepke beer, ein sigaar en de GSM neet wiet weg.

Rogier doe hubs eine sjtein verlag inne Maas.
’t Water geit doa angers es eerder.
De sjtraum van ein rivier hilste neet taege,
’t Water vindjt ter sjteeds eine waeg omhaer.
Misjien ins, gevuldj door sjnee en raege,
Numt de Maas dae keezel mit zich mit.
Om um dan glad en rondj gesjtreke,
Te loate ruste in de luwte van de zee.
Rogier doe hubs eine sjtein verlag inne Maas,
Weit det veer dich noats zulle vergaete.
Doe hubs bewies geleverdj van dien besjtaon,
Want door ’t verligge van dae eine sjtein,
Zal de Maas nooit meer dezelfde waeg goan.

Vandaag is vandaag,
En mörge is mörge.
… ’t Is gedoan.

Mer ’t is dich toch weer gelök om get neer te zitte:
Keuninginnedag is veur Eensgezindheid veur ins en veur altied Pexie-daag.

Leeve Rogier rös noe mer zach, doe bös veur altied biej os.

Bestuur, dirigenten, instructeurs, leden en damescomité
Van de Koninklijk Erkende Fanfare Eensgezindheid
Maasbracht-Beek

Leave a Reply